Lá na hAfraice 2026 le ceiliúradh ar fud Fhine Gall

Tá Fine Gall ar tí Lá na hAfraice 2026 a cheiliúradh, agus imeachtaí ar siúl i mBaile Brigín, i Lusca, i Sord, agus i Mullach Eadrad. Is ceiliúradh domhanda bliantúil ar fud an domhain ar mhuintir, cultúir agus acmhainneacht na mór-roinne iontaí sin é Lá na hAfraice. Bíonn sé ar siúl an 25 Bealtaine gach bliain, ach déanfar é a cheiliúradh in áiteanna éagsúla ar fud mhí na Bealtaine.  Is é atá i Lá na hAfraice ná deis do dhaoine teacht le chéile agus éagsúlacht na hAfraice a cheiliúradh. 

Ag obair di i gcomhoibriú leis an Roinn Gnóthaí Eachtracha/le Cúnamh Éireann, tá Roinn Forbartha agus Ionchuimsithe Pobail Fhine Gall ag tacú le grúpaí éagsúla Lá na hAfraice 2026 a cheiliúradh. Le linn na n-imeachtaí, taispeánfar an iliomad gnéithe cultúrtha den Afraic agus glacfar lenár n-oidhreacht chomhroinnte. 

Imeachtaí Lá na hAfraice i bhFine Gall:

• Cairde, Pobal Afracach Fhine Gall, an Satharn an 23 Bealtaine 2026, 1pm-6pm, Cairde, Baile Brigín, Co. Bhaile Átha Cliath
• Ionad Cultúir Phobal Lusca, an Satharn an 23 Bealtaine 2026; 2.15pm-6.00pm, Lusca, Co. Bhaile Átha Cliath 
• The Bold Woman Association, an Satharn an 30 Bealtaine 2026, 12pm-5pm, Caisleán Shoird, Sord
• Children 4 World Children, an Satharn an 30 Bealtaine 2026, 3pm-6.30pm, Ionad Pobail Mhullach Eadrad, Baile Átha Cliath 15

Beidh an chéad imeacht ar siúl in Cairde, Pobal Afracach Fhine Gall, Baile Brigín, Dé Sathairn an 23 Bealtaine ó 1pm go dtí 6pm. Óstálfaidh an Pobal Afracach ceiliúradh cumhachtach ar stair na hAfraice ar lena linn a thabharfar onóir do laochra ar fud 54 thír na hAfraice a sheas ar son an cheartais, na saoirse, na dínite agus chearta an duine. 

Beidh imeacht Lá na hAfraice in Ionad Cultúir Lusca ar siúl Dé Sathairn an 23 Bealtaine i Lusca ó 2.15pm go dtí 6pm. Sárthaispeántas ina mbeidh ceol, taispeántas, gruaig a chur i dtrilseáin, agus Blas an Bhia Afracaigh. Ag obair dúinn le hEaglais Chríostaí Shlánaithe Dé, cuirfimid cultúr dearfach na hAfraice ar taispeáint inár mbaile le haghaidh rannpháirtíocht ár bpobail uile.

Déanfaidh The Bold Woman Association ceiliúradh ar Eagrán OWANBE de Lá na hAfraice i gCaisleán Shoird Dé Sathairn an 30 Bealtaine ó 12pm meán lae go dtí 6pm. Is ceiliúradh é ar fhréamhacha, eagna agus cumhacht chomhchoiteann na héagsúlachta san Afraic, agus is é cód feistis Ríochas na hAfraice a bheidh i bhfeidhm. 

Déanfaidh The Children 4 World Children ceiliúradh ar Fhuaimeanna ón Afraic ag Ionad Pobail Mhullach Eadrad, Baile Átha Cliath 15, Dé Sathairn an 30 Bealtaine ó 3pm go dtí 6pm.  Imeacht cultúrtha a dhéanann ceiliúradh ar éagsúlacht agus tionchar domhanda cheol na hAfraice agus ardán do Chleachtóirí cultúir chun a gcuid scileanna agus oidhreachta a chomhroinnt. 

Dúirt an Comh. Tom O’Leary, Méara Fhine Gall: “Is é is Lá na hAfraice ann ná deis chun oidhreacht agus cultúr saibhir éagsúil na hAfraice agus ár bpobail ionchuimsitheacha bheoga i bhFine Gall a cheiliúradh trí na himeachtaí iontacha atá beartaithe ar fud an chontae.” 

Dúirt Ethna Felten, Leas-Phríomhfheidhmeannach Chomhairle Contae Fhine Gall: “Tá ag Fine Gall raidhse grúpaí pobail gníomhacha agus gafa a dhéanann ionadaíocht dár bpobal ilchultúrtha agus a fhaigheann tacaíocht ónár bhfoirne Forbartha agus Cuimsithe Pobail i bhFine Gall. Tá imeachtaí amhail Lá na hAfraice an-tábhachtach chun ár n-éagsúlacht a cheiliúradh agus chun ionchuimsiú sóisialta agus rannpháirtíocht an phobail a fheabhsú.”

Déanfar Lá na hAfraice a cheiliúradh le sraith imeachtaí a bheidh ar siúl ar fud na tíre. Tá Údaráis Áitiúla ar fud na hÉireann ar tí raon imeachtaí cultúrtha, ealaíne agus teaghlaigh a óstáil. Áireofar leo sin imeachtaí cultúrtha comhaimseartha Afracacha agus Éireannacha, laethanta spraoi teaghlaigh, imeachtaí faisin, imeachtaí ealaíne, imeachtaí scannán, imeachtaí ceoil, imeachtaí damhsa agus imeachtaí bia, a bheidh ar siúl i mbailte agus cathracha ar fud na hÉireann.

Dúirt an tAire Neale Richmond: “Is é is Lá na hAfraice ann ná deis chun na naisc thrádála, pholaitiúla agus chultúrtha a bhíonn ag fás idir Éire agus tíortha ar fud na hAfraice a chur chun cinn. Tá an acmhainneacht don chaidreamh seo thar na blianta atá le teacht thar a bheith mór. Is ionann an trádáil idir Éire agus tíortha ar fud na hAfraice agus thart ar €9 billiún gach bliain agus bíonn sí ag fás i gcónaí.” 

Chun tuilleadh faisnéise a fháil faoi Lá na hAfraice agus faoi na himeachtaí uile ar fud na tíre, téigh chuig suíomh Gréasáin na Roinne Gnóthaí Eachtracha: Lá na hAfraice 2026 | Ireland.ie