Taisteal do Dhaltaí i Mullach Íde déanta níos sábháilte trí chlár náisiúnta

Rinne Méara Fhine Gall, an Comhairleoir Brian McDonagh agus an tAire Comhshaoil, Aeráide agus Cumarsáide agus an tAire Iompair, Darragh O'Brien TD, ceiliúradh inniu ar chríochnú na n-oibreacha Bealaí Sábháilte chun na Scoile a rinneadh i Scoil Náisiúnta an Phápa Eoin Pól II, Mullach Íde.

Forbraíodh an Clár Bealaí Sábháilte chun na Scoile i gcomhpháirtíocht idir an tÚNI agus Scoileanna Glasa, An Taisce, i 2020, mar fhreagra ar an ngá atá ann tacú le scoileanna chun siúl agus rothaíocht chun na scoile a mhéadú. Chuir Scoil Náisiúnta an Phápa Eoin Pól II i Mullach Íde isteach ar an gclár agus d’éirigh léi cáiliú do Bhabhta 1 den chlár, mar aon le deich scoil eile ar fud chontae Fhine Gall.

Is é aidhm an tionscnaimh seo ná sábháilteacht a fheabhsú, plódú tráchta a laghdú, agus rochtain ar scoileanna a fheabhsú. Díríonn sé ar bhonneagar siúil agus rothaíochta a uasghrádú chun bealaí níos sábháilte agus níos inrochtana a chruthú do dhaltaí. Ina theannta sin, trí áiseanna páirceála rothair a leathnú, tá sé mar aidhm ag an gclár níos mó daltaí a spreagadh chun rothaíocht chun na scoile.

Tá dearaí Bealaí Sábháilte chun na Scoile uathúil do gach scoil. I measc cuid de na feabhsuithe atá le feiceáil i Scoil Náisiúnta an Phápa Eoin Pól II tá acomhail níos cúinge chun trácht atá ag druidim leis a mhoilliú, cosáin sínte, comharthaíocht mhéadaithe, trasrian síogach uasghrádaithe agus cruthú sráide scoile saor ó charranna.

Dúirt Méara Fhine Gall, an Comhairleoir Brian McDonagh, “Nuair a bhraitheann páistí sábháilte ar a dturas chuig agus ón scoil, is dóichí go roghnóidh siad féin agus a gcaomhnóirí roghanna taistil ghníomhacha ar nós siúl, rothlú nó rothaíocht. Trí bhonneagar níos sábháilte a chruthú, táimid ag spreagadh nósanna sláintiúla i measc páistí scoile a shíneann i bhfad níos faide ná geataí na scoile."

Dúirt David Storey, Stiúrthóir ar an gComhshaol, ar Ghníomhú ar son na hAeráide, ar Thaisteal Gníomhach agus ar Spórt i gComhairle Contae Fhine Gall “Ní hamháin go ndéanann na feabhsuithe seo taisteal gníomhach níos inrochtana agus níos tarraingtí, ach cuidíonn siad freisin le feasacht tiománaithe a ardú. Trí thiománaithe a spreagadh chun a bheith níos aireach ar láithreacht leanaí agus an gá atá le tiomáint chúramach in aice le scoileanna, táimid ag cruthú timpeallacht níos sábháilte agus níos tacúla do dhaoine óga chun taisteal go neamhspleách agus go muiníneach."

Tá Comhairle Contae Fhine Gall tiomanta do na feabhsuithe riachtanacha a dhéanamh agus bonneagar a shuiteáil chun tacú le taisteal gníomhach, rud a fhágann gurb é an chéad rogha é do thurais áitiúla faoi bhun 5km. Táimid faoi láthair i gcéim an dearaidh tosaigh do Bhabhta 2 de chlár na mBealaí Sábháilte chun na Scoile (BSCNS), agus táthar ag súil go dtosóidh na hoibreacha tógála ar an láthair go luath i Ráithe 2 de 2026. Ag an am céanna, tá tús curtha againn le céim luath rannpháirtíochta Bhabhta 3 den chlár agus táimid ag comhoibriú go gníomhach lenár gcomhpháirtithe in An Taisce chun an chéim seo a chur chun cinn.

Chun tuilleadh eolais a fháil faoi Bhealaí Sábháilte chun na Scoile i bhFine Gall, tabhair cuairt ar https://www.fingal.ie/activetravel/srts