Seolann Fine Gall Scéim Shoird um Rothaíocht chun na Scoile agus Leabharlann Rothar Shoird

Sheol Comhairle Contae Fhine Gall, in éineacht le Darragh O’Brien TD, an tAire Iompair, Scéim Shoird um Rothaíocht chun na Scoile agus Leabharlann Rothar Shoird inniu. Is é atá iontu ná dhá thionscnamh atá ceaptha chun an rothaíocht a dhéanamh níos inrochtana agus chun níos mó daoine a spreagadh chun taisteal gníomhach a roghnú le haghaidh gnáth-thurais laethúla.

Is é atá i Scéim Shoird um Rothaíocht chun na Scoile ná treoirchlár atá á chur i gcrích i gcúig mheánscoil: Fingal Community College, St Finian’s Community College, Swords Community College, Loreto College, Sord, agus Coláiste Choilm. Tá sé mar aidhm leis an tionscnamh tacú le scoláirí a thiomáintear chun na scoile faoi láthair ach nach bhfuil rochtain acu ar rothar.

Trí chomhpháirtíocht le The Rediscovery Centre agus The Bike Hub, gheobhaidh scoláirí incháilithe rothar athchóirithe agus glas rothair saor in aisce, rud a chabhróidh leo an t-aistriú a dhéanamh ó thaisteal carrbhunaithe chuig rothaíocht neamhspleách. Tá sé mar aidhm leis an scéim an rothaíocht i measc scoláirí a mhéadú, an brú tráchta a bhaineann leis an scoil a laghdú, agus tacú le nósanna taistil níos inbhuanaithe.

Ag freastal ar an seoladh dó, chuir an Comh. Luke Corkery, Leas-Mhéara Fhine Gall, a thacaíocht in iúl. Dúirt sé: “Cuireann na tionscadail seo chomh mór sin lenár bpobal. Spreagann siad daoine chun rothaíocht a roghnú mar mhodh iompair atá inbhuanaithe agus sláintiúil, agus an brú tráchta á laghdú agus feabhas á chur ar cháilíocht an aeir ag an am céanna, rud a chuireann feabhas ar cháilíocht na beatha do chónaitheoirí Fhine Gall ar deireadh.”

Dúirt AnnMarie Farrelly, Príomhfheidhmeannach Chomhairle Contae Fhine Gall: “Tá seoladh na dtionscadal seo ina léiriú ar an bhfís straitéiseach fhadtéarmach atá ag Comhairle Contae Fhine Gall pobail inbhuanaithe, nasctha agus shláintiúla a chruthú. Trí thionscnaimh den sórt seo, táimid ag déanamh rud níos ionchuimsithí den taisteal gníomhach agus, ag an am céanna, táimid ag tacú lenár spriocanna um ghníomhú ar son na haeráide agus ag cruthú Fhine Gall níos glaise do na glúnta atá le teacht.”

Mar chomhlánú ar an tionscnamh seo, sheol Comhairle Contae Fhine Gall Leabharlann Rothar Shoird freisin i gcomhpháirt le Bleeper, le páirtchistiú ón Údarás Náisiúnta Iompair. Ag cur leis an rath a bhí ar an Leabharlann Rothar i mBaile Átha Cliath 15, tugtar leis an scéim deis do rannpháirtithe rothar leictreach a fháil ar iasacht saor in aisce ar feadh suas le trí mhí, rud a thugann an deis dóibh triail a bhaint as rothaíocht a dhéanamh de rothar leictreach sula smaoiníonn siad ar rothar a cheannach.

Níl an scéim ar fáil ach do chónaitheoirí Shoird amháin agus tugtar tacaíocht léi don rothaíocht mar rogha áisiúil, inacmhainne agus inbhuanaithe le haghaidh comaitéireachta, turais áitiúla, fóillíochta, agus aclaíochta. Is féidir le rannpháirtithe cineálacha éagsúla rothar leictreach a fháil ar iasacht, lena n-áirítear rothair leictreonacha chaighdeánacha, rothair leictreonacha infhillte agus rothair earrfhada, rud a chabhraíonn leo an rothaíocht a chur isteach ina ngnáthaimh laethúla agus an spleáchas ar charranna príobháideacha a laghdú ag an am céanna. Is féidir le rannpháirtithe cláraithe a bhfuil rothar leithdháilte orthu é a bhailiú ó Ionad Pobail Choill na nÚll nó ó Ionad Pobail an Tobair Naofa, gan aon táille chíosa a bheith ann agus gan ach éarlais atá in-aisíoctha go hiomlán a bheith ag teastáil.

Dúirt David Storey, Stiúrthóir Seirbhísí um Chomhshaol, Gníomhú ar son na hAeráide, Taisteal Gníomhach agus Spórt i gComhairle Contae Fhine Gall: “Táimid tiomanta dá chinntiú go mbíonn an taisteal gníomhach inrochtana ag gach duine i bhFine Gall. Trí rochtain níos fearr a thabhairt ar rothair agus ar rothair leictreacha, tugtar deis do chónaitheoirí leis na tionscnaimh seo taithí a fháil ar na buntáistí a bhaineann leis an rothaíocht, agus cothaítear leo aistriú i dtreo roghanna taistil níos inbhuanaithe.”

Dúirt Darragh O’Brien TD, an tAire Iompair: “Tá níos mó i gceist le níos mó daoine a spreagadh chun an rothaíocht a roghnú ná bonneagar; baineann sé le deiseanna a sholáthar agus le bacainní a bhaint freisin. Leis na cláir seo, cabhrófar le gach duine, beag beann ar aois, a fháil amach conas is féidir leis an rothaíocht a bheith ina cuid dá ngnáthshaol laethúil.”

Is féidir le scoláirí, tuismitheoirí agus scoileanna ar spéis leo tuilleadh eolais a fháil faoi Scéim Shoird um Rothaíocht chun na Scoile, nó le cónaitheoirí ar spéis leo páirt a ghlacadh i Leabharlann Rothar Shoird, ríomhphost a sheoladh chuig [email protected] chun tuilleadh faisnéise a fháil.