Mór-Gharsprioc Bainte Amach do Linn Snámha Pobail Bhaile Brigín
Tar éis ceadú pleanála a fháil ag cruinniú na Comhairle an 11 Bealtaine 2026, dheimhnigh Comhairle Contae Fhine Gall go bhfuil tionscadal linn snámha pobail Bhaile Brigín, a bhfuiltear ag súil leis le fada, ag dul ar aghaidh anois i dtreo na tógála, rud atá ina gharsprioc shuntasach don bhaile agus do réigiún Fhine Gall Thuaidh i gcoitinne.
Tá an fhorbairt bheartaithe comhdhéanta de shaoráid phoiblí linne snámha aon stóir ina bhfuil linn snámha 25 mhéadar agus sé lána agus gailearaí féachana don lucht féachana.
I measc na dtaitneamhachtaí tacaíochta beidh saoráidí gléasta a bheidh i stíl sráidbhaile, grúpa agus inrochtana, cithfholcadáin agus leithris, limistéar fáiltithe agus feithimh, oifigí foirne agus saoráidí leasa, seomraí cruinnithe, limistéir stórála, seomraí stórála gléasra agus ceimiceán, agus áit stórála do bhugaithe.
Ar aon dul le cuspóirí inbhuanaitheachta Chomhairle Contae Fhine Gall, suiteálfar grianphainéil fhótavoltacha ar leibhéal an dín chun tacú le hoibriú atá tíosach ar fhuinneamh.
D’fháiltigh an Comh. Tom O’Leary, Méara Fhine Gall, roimh an dul chun cinn:
“Is forbairt an-dearfach í seo do Bhaile Brigín, do na Sceirí, do Lusca agus d’áiteanna níos faide i gcéin. Beidh an linn snámha ina saoráid phoiblí ardchaighdeáin inrochtana do theaghlaigh, do scoileanna agus do shnámhóirí, beag beann ar aois, agus cuirfidh sí go mór le bonneagar sóisialta agus áineasa an limistéir. Is lá iontach é d’Fhine Gall Thuaidh, agus infheistíocht mheasta de bhreis agus €11 mhilliún i gceist.”
Leag David Storey, Stiúrthóir Seirbhísí, béim ar thábhacht an tionscadail:
“Is céim mhór chun tosaigh í seo do Bhaile Brigín agus do limistéar Fhine Gall Thuaidh i gcoitinne. Tá gá soiléir ann le fada an lá le saoráid phoiblí snámha atá ar ardchaighdeán, agus táimid ag druidim níos gaire anois leis an méid sin a bhaint amach. Baineann an tionscadal seo le rochtain a mhéadú, le tacú le stíleanna maireachtála gníomhacha, agus le hacmhainn ríthábhachtach phobail a sholáthar a rachaidh chun tairbhe do gach duine, beag beann ar aois, go ceann i bhfad. Is eiseamláir láidir é ar an dóigh ar féidir le hinfheistíocht spriocdhírithe fíordhifear marthanach a dhéanamh i ngnáthshaol laethúil daoine.”
Dearadh an togra d’aon ghnó chun an soláthar atá ann cheana a chomhlánú, in ionad dul in iomaíocht leis. Is ionann é agus freagairt spriocdhírithe chomhréireach do bhearna shainaitheanta i saoráidí poiblí snámha.
Dúirt AnnMarie Farrelly, Príomhfheidhmeannach Chomhairle Contae Fhine Gall:
“Is ionann an tionscadal seo agus infheistíocht láidir fhiúntach i mbonneagar pobail. Is toradh an-dearfach é seo tar éis tréimhse fhadaithe deartha agus pleanála, á chinntiú gur féidir linn snámha atá ar ardchaighdeán agus atá oiriúnach don fheidhm a sholáthar chun freastal ar riachtanais Bhaile Brigín agus an limistéir i gcoitinne.”
Tar éis próiseas comhchomhairliúcháin phoiblí inar léiríodh tacaíocht láidir do linn snámha phoiblí áitiúil, tá sé beartaithe an dearadh a bheachtú trí dhoimhneacht athraitheach linne snámha idir 1.10 méadar agus 1.80 méadar a thabhairt isteach. Leis sin, freastalófar ar raon níos leithne úsáideoirí agus gníomhaíochtaí, ag tacú le húsáid ionchuimsitheach agus sholúbtha le haghaidh cláir foghlama snámha, snámh teaghlaigh, oiliúint, agus áineas.
Dúirt Mary McMorrow, Príomhoifigeach Feidhmiúcháin Shnámh Éireann:
“Cuireann Snámh Éireann fáilte mhór roimh an gcinneadh ó Chomhairle Contae Fhine Gall an chéad linn snámha phoiblí i bhFine Gall a chur chun cinn i mBaile Brigín. Is céim dhearfach chun tosaigh í do mhuintir Fhine Gall. Leis an tsaoráid seo a bhfuil géarghá léi, méadófar na deiseanna chun snámh go háitiúil agus tacófar le rannpháirtíocht, sláinte agus folláine do gach duine, beag beann ar aois.”
Tá soláthar na linne snámha ag an suíomh seo ag teacht le príomhchreataí straitéiseacha, lena n-áirítear Máistirphlean Fhearann an Chaisleáin 2021, Plean Forbartha Fhine Gall 2023-2029, agus Plean Áitiúil Spóirt agus Gníomhaíochta Fisiciúla Chomhairle Contae Fhine Gall 2024-2029, a thacaíonn le mórchuspóirí maidir le sláinte, le folláine agus le pobail ghníomhacha.
