Fógraíonn Comhairle Contae Fhine Gall Faighteoirí Scéim Tacaíochta Ealaíontóirí Fhine Gall 2025

Tá áthas ar Oifig Ealaíon Chomhairle Contae Fhine Gall faighteoirí Scéim Tacaíochta Ealaíontóirí Fhine Gall 2025 a fhógairt. Dámhadh €250,000 san iomlán d’ealaíontóirí gairmiúla atá ag obair sa cheol, san amharc-ealaín, sa drámaíocht, sa litríocht, sa scannánaíocht agus sa damhsa chun tacú le deiseanna taistil agus forbartha gairmiúla, le cónaitheachtaí, agus le forbairt saothair nua.

Tá Scéim Tacaíochta Ealaíontóirí Fhine Gall ar an bhfód le deich mbliana anuas anois agus tá sí ina príomhshnáithe cistiúcháin laistigh de thiomantas Fhine Gall do thacú le healaíontóirí gairmiúla ag gach céim dá ngairm. Tá an Scéim deartha chun cothú a dhéanamh ar chleachtas na n-ealaíontóirí aonair atá ina gcónaí i bhFine Gall nó a bhfuil baint acu le Fine Gall, agus aitheantas á thabhairt don ról ríthábhachtach a imríonn siad i dtírdhreach cultúrtha atá beoga agus éagsúil a mhúnlú.

Fuarthas an líon ab airde iarratas riamh ar scéim na bliana 2025. Rinne painéal neamhspleách comhairleoirí a bhí sonrach don fhoirm ealaíne measúnú ar 305 iarratas. Ba mhéadú 58% é sin i gcomparáid leis an mbliain 2022. D’éirigh le 29% de na hiarratasóirí, tar éis próiseas roghnúcháin iomaíoch agus dian.

Dúirt AnnMarie Farrelly, Príomhfheidhmeannach Chomhairle Contae Fhine Gall:

“Tá Comhairle Contae Fhine Gall tiomanta do struchtúir inbhuanaithe fhadtéarmacha tacaíochta a thógáil le haghaidh na n-ealaíon gairmiúil. Tríd an infheistíocht sin, táimid ag cothú éiceachóras saibhir ina gcuirtear de chumas ar ealaíontóirí nuálaíocht a dhéanamh agus rannchuidiú le saol cultúrtha ár gcontae.”

Dúirt an Comh. Tom O’Leary, Méara Fhine Gall: “Is fianaise ar an bhfuinneamh cruthaitheach atá ag fás inár bpobail í éagsúlacht na gcleachtas ealaíonta. Comhghairdeas leis na dámhachtaithe uile.”

Dúirt Sarah O’Neill, Oifigeach Ealaíon an Chontae: “I gcomhréir leis an bPlean Ealaíon 2023-2029, tá Scéim Tacaíochta Ealaíontóirí Fhine Gall ar cheann de na huirlisí is tábhachtaí atá againn chun a chur ar chumas ealaíontóirí fás, rioscaí a ghlacadh agus a gcuid saothair a thabhairt chuig spriocphobail nua. Táimid bródúil as tacú le healaíontóirí Fhine Gall de réir mar a fhorbraíonn siad a gcleachtas go háitiúil, go náisiúnta agus go hidirnáisiúnta.”

Dúirt Mina Eusebio freisin: “Is onóir dom a bheith ar dhuine d’fhaighteoirí Scéim Tacaíochta Ealaíontóirí Fhine Gall do 2025 agus táim buíoch as sin. Mar reacaire a úsáideann ceol mar phríomh-mheán, tá sé mar aidhm agam mothú na scéalta a ghabháil trí fhuaim. A bhuí leis an deontas seo, beidh mé in ann modhanna leathnaithe fuaime a iniúchadh agus a thriail, agus mé ag comhoibriú le ceoltóirí éagsúla agus le

Ben Rawlins, innealtóir fuaime, chun an treo a leanfaidh mo chuid cumadóireachta nua a stiúradh, ar treo é a bhíonn ag éirí níos fairsinge.”

Dúirt Síomha McQuinn: “Táim fíorthógtha faoi leanúint ar aghaidh le mo chuid oibre a bhuí leis an tacaíocht ó Scéim Tacaíochta Ealaíontóirí Fhine Gall. Rannchuidíonn scéimeanna ar a nós seo go mór le healaíontóirí a chumasú chun tús áite a thabhairt dá saothar cruthaitheach, agus is onóir dom a bheith ina measc siúd a roghnaíodh i mbliana.”

Dúirt Caitríona O’Leary: “Tá Scéim Tacaíochta Ealaíontóirí Fhine Gall ina cabhair ollmhór dom mar amhránaí agus mar chumadóir. Táim thar a bheith buíoch as an tacaíocht, as an spreagadh agus as an aitheantas a thugann sí dom i mo ghairm.”

Is ceoltóir agus ealaíontóir (í/iad) Mina Eusebio a dhíríonn ar ghlór na ndaoine atá faoi thearcionadaíocht i spásanna cruthaitheacha na hÉireann a mhéadú. Le déanaí, bhain siad céim Baitsiléara Ceoil i nGlór agus Ceoleolaíocht amach ó Conservatoire OT Baile Átha Cliath. Tá siad gníomhach mar stiúrthóir ceoil, mar stiúrthóir ealaíne, mar thaighdeoir, mar chumadóir agus mar thaibheoir. Is í Mina bunaitheoir agus Stiúrthóir Cruthaitheach Chór Óige Shoird agus chan sí roimhe seo le grúpaí cáiliúla ensemble amhail New Dublin Voices, Cór Óige na hÉireann, agus Cór Aireagail OT Baile Átha Cliath, agus í ag taibhiú go háitiúil agus go hidirnáisiúnta. Chomh maith leis sin, bhí siad le feiceáil i dtaispeántais mór le rá amhail an tsraith ‘Young and Emerging’ le Hot Press agus ‘Ones To Watch 2024’ le Whelan.

Is aisteoir, scríbhneoir agus stiúrthóir as Baile Átha Cliath a thaibhigh a saothar mar chuid d’Fhéile Dhún Éideann ar an Imeall agus d’Fhéile Bhaile Átha Cliath ar an Imeall í Síomha McQuinn. Ghlac sí páirt sa chlár ‘Assemble’ de chuid axis Ballymun sa bhliain 2024 agus sa scéim tionscnaimh ‘Box of Tricks’ de chuid Amharclann na Mainistreach. Tá cúlra aici i dtobchumadóireacht agus i bhfuirseoireacht ar an láthair agus tá sraith teilifíse á forbairt aici faoi láthair faoin tionscnamh ‘Incubator’ de chuid X-Pollinator.

Tá cáil idirnáisiúnta ar Chaitríona O’Leary as a cuid léirithe diana agus paiseanta ar Cheol Luath agus ar amhráin Éireannacha thraidisiúnta agus mar chumadóir. Tá aitheantas forleathan faighte aici as a cuid oibre ar cheol Éireannach atá caillte nó nach gcloistear go minic a aimsiú agus a sheinm. An taifeadadh uaithi dar teideal ‘The Wexford Carols’, ina raibh Tom Jones, Rosanne Cash agus Rhiannon Giddens mar aoi-ealaíontóirí, shroich sé uimhir 1 ar chairteacha Billboard agus Amazon. Scaoileadh a halbam le Anakronos, dar teideal The Red Book of Ossory, ar fud an domhain sa bhliain 2020 agus fuarthas léirmheasanna iontacha ina leith.

Tá an liosta iomlán d’fhaighteoirí na bliana 2025 ar fáil anseo