Féile Staire Fhine Gall 2020 seolta i gCaisleán Shoird
Sheol Méara Fhine Gall, an Comhairle David Healy, ceathrú Féile Bhliantúil Staire Fhine Gall, ar an Déardaoin, an 3 Meán Fómhair.
Reáchtálfar féile na bliana ar líne agus beidh na cainteanna ar fad ar fáil ar chainéal YouTube agus ardáin meán sóisialta Leabharlanna Fhine Gall i rith sheachtain na féile idir an 12 agus 19 Meán Fómhair.
Tá comóradh céad bliain Chreach Bhaile Brigín ar siúl i mbliana agus is é sin príomhthéama ár bhFéile. Áirítear i gclár na bliana seo arís lá Stair an Chaisleáin agus beidh cainteoirí éagsúla ag roinnt eolais faoi ábhair spéise a bhaineann le Creach Bhaile Brigín, Cogadh na Saoirse agus coinníollacha polaitiúla eile a bhaineann leis an tréimhse seo de stair na hÉireann.
Bhí an méid seo a leanas le rá ag Méara Fhine Gall, an Comhairleoir David Healy: “I bhfianaise gach rud atá tarlaithe ó thús na bliana seo tá sé tábhachtach go mbeimis in ann déileáil leis an saol mar atá. Baineann tábhacht le súil a chaitheamh siar ar ár stair, agus is dea-scéala é go mbeidh Féile Staire na bliana seo á reáchtáil. Cosúil le formhór na n-imeachtaí atá á reáchtáil na laethanta seo, beidh cur chuige difriúil againn i mbliana. Beidh na cainteanna staire ar fad á thaifeadadh sa Séipéal i gCaisleán Shoird. Is mian liom buíochas a ghabháil le foireann Leabharlainne Chomhairle Contae Fhine Gall a d’eagraigh na cainteanna seo.”
Bhí an méid seo a leanas le rá ag an Leabharlannaí Contae, Betty Boardman: “Bhí rún daingean againn leanúint ar aghaidh le Féile Staire Fhine Gall i mbliana d’ainneoin COVID-19. Beidh féile na bliana seo difriúil, áfach, mar gheall ar shrianta riachtanacha COVID-19, agus ní bheidh aon lucht féachana i láthair, ach beidh na cainteanna taifeadta agus á gcraoladh ar ár gcainéal YouTube agus ardáin meán sóisialta ionas gur féidir le daoine tairbhe a bhaint astu. Tá clár spéisiúil curtha le chéile ag comhaltaí foirne na Leabharlann chun comóradh a dhéanamh ar chéad bliain ó tharla Creach Bhaile Brigín agus 175 bliain ó thug Frederick Douglass, daonfhuascailteoir agus iarsclábhaí Afrai-Mheiriceánach, cuairt ar Éirinn.”
Cuimsítear sna cainteanna atá á dtaifeadadh sa Séipéal i gCaisleán Shoird léargas iardhearcach ar Chreach Bhaile Brigín ó staraí áitiúil agus iar-Leabharlannaí Sinsearach, leabharlanna Fhine Gall, Jim Walsh, imeachtaí atá idirnasctha le Creach Bhaile Brigín leis an gComhairleoir Cathal Boland, conas a spreag Creach Bhaile Brigín úrscéal cáiliúil do leanaí Brian Gallagher, Pawns, agus saol Molly Adrian le Lou Boland.
Labhróidh Declan Brady faoin Rialtas Áitiúil agus Cogadh na Saoirse i bhFine Gall; labhróidh an staraí Brian Hanley faoi ról na nDúchrónach agus na bhfórsaí Cosanta i rith Chogadh na Saoirse, agus labhróidh Brian Dorney faoi Chogadh na Saoirse i mBaile Átha Cliath.
Ar deireadh, beidh David O’Connor ar an ardán i dteannta le Aidan agus Helen Lawlor chun rogha ceoil agus amhrán a chur inár láthair a bhaineann leis an tréimhse agus i measc na n-amhrán a bheidh le cloisteáil beidh ‘The Bold Black and Tan’ agus ‘Kevin Barry’.
Bhí an méid seo a leanas le rá ag AnnMarie Farrelly, Príomhfheidhmeannach Chomhairle Contae Fhine Gall: “Is imeacht tábhachtach bliantúil i bhFine Gall an Fhéile Staire, agus cúis dóchais é tiomantas fhoireann na Leabharlainne a chinntiú go bhféadfaí an Fhéile a reáchtáil i mbliana. Leagfar béim i rith Fhéile na bliana seo ar chomóradh céad bliain Chreach Bhaile Brigín agus tá clár iontach cainteanna forbartha chun comóradh a dhéanamh ar an imeacht seo, agus mholfainn do gach duine féachaint ar na cainteanna seo ar ár n-ardáin éagsúla meán sóisialta.”
Cuimseofar sa taispeántas seo sé phainéal faisnéise suite de dhoiciméid bhunaidh a bhaineann go sonrach leis an imeacht lena n-áirítear Miontuairiscí lámhscríofa bunaidh ó chruinnithe de chuid Choimisinéirí Baile Bhaile Brigín, cóip bhunaidh den Fhorógra Cúitimh maidir le Díobháil Choiriúil do Mhaoin bronnta ar chónaitheoir ó Shráid Chluain Ard agus admháil ó William Cochrane ag cur in iúl go ndéileálfaidh sé le ceist a bhaineann leis an Rialtas Sealadach agus Michael Collins. Beidh nuachtscannán British Pathé ina dtaispeántar an léirscrios a tharla ina dhiaidh ar taispeáint mar chuid den taispeántas freisin.
Tabharfaidh an staraí ó SAM, Cecelia Hartsell, a bhfuil sainspéis aici i stair Afrai-Mheiriceánach agus stair shóisialta Mheiriceá cainteanna faoi Martin Luther King Óg., Frederick Douglass in Éirinn agus Íobairt Fola: Comhlintí polaitiúla Náisiúnaithe Éireannacha agus Afrai-Mheiriceánacha i rith Thréimhse an Chogaidh Mhóir.
Bhí an méid seo a leanas le rá ag Margaret Geraghty, Stiúrthóir Seirbhísí : “Cúis áthais dom go bhfuiltear ag leanúint leis an gclár iontach seo i mbliana ainneoin go bhfuil an leagan amach beagán éagsúil i gcomparáid leis na blianta roimhe seo. Bliain an-speisialta d’Fhine Gall í seo, ó tharla comóradh a bheith á dhéanamh ar Chreach Bhaile Brigín ar a bhfuil béim ar leith á leagan i mbliana, agus mholfainn don oiread daoine agus is féidir breathnú ar na cainteanna seo ar ardáin éagsúla meán sóisialta Leabharlanna Fhine Gall.”
Is féidir an clár a íoslódáil anseo Féile Staire Fhine Gall
Má theastaíonn tuilleadh eolais faoin bhFéile uait déan teagmháil le:
Marguerite Drake – Teil: 01 8905531 Enda Greene – Teil: 01 8905531
Ríomhphost: - [email protected]
Imeachtaí & Caidreamh Poiblí Leabharlanna Fhine Gall