Beidh spraoi teaghlaigh agus spiorad pobail i lár an aonaigh nuair a fhillfidh Blasanna Fhine Gall ar ais i mí Iúil

Tá ríméad ar Chomhairle Contae Fhine Gall a fhógairt go mbeidh Blasanna Fhine Gall, an t-imeacht samhraidh suaitheanta dá cuid, ar siúl ag Teach agus Feirm an Droichid Nua i nDomhnach Bat ó 11 a.m. go 6 p.m. Dé Sathairn an 4 Iúil agus Dé Domhnaigh an 5 Iúil 2026.

Agus comóradh ceithre bliana déag a bunaithe á cheiliúradh aige, beidh an fhéile seo a bhfuil an-ghean uirthi ag díriú arís ar na gnéithe a bhí taobh thiar dá rath i gcónaí. Trí bhéim athnuaite a chur ar spiorad pobail, ar eispéiris atá oiriúnach do theaghlaigh, ar tháirgí áitiúla agus ar oidhreacht shaibhir talmhaíochta Fhine Gall, féachfaidh an t-imeacht i mbliana le daoine, gnólachtaí agus pobail a thabhairt le chéile chun an chuid is fearr atá le tairiscint ag an gcontae a shárthaispeáint agus a cheiliúradh.

Dearadh an t-imeacht i mbliana chun ceangail idir daoine agus áit a neartú. Gné lárnach den fhéile is ea saol na tuaithe agus saol na cathrach a cheangal le chéile agus spás a chur ar fáil inar féidir le teaghlaigh, le comharsana, le gnólachtaí áitiúla agus le cuairteoirí teacht le chéile chun eispéiris a chomhroinnt, chun scileanna nua a fhoghlaim agus chun tacú le fiontair áitiúla.

A bhuí leis an leagan amach athnuaite, feicfidh cuairteoirí rogha leathnaithe siamsaíochta theaghlaigh, rannpháirtíocht mhéadaithe an phobail, tuilleadh eispéireas idirghníomhach do dhaoine de gach aois, agus béim níos láidre ar shaothróirí, déantóirí, feirmeoirí agus táirgeoirí bia áitiúla.

Dúirt an Comh. Tom O’Leary, Méara Fhine Gall: “Ón tús, tá Blasanna Fhine Gall dírithe ar phobal, ar cheangal agus ar chultúr áitiúil a cheiliúradh. I mbliana, beidh an fhéile dírithe arís ar na rudaí is mó a thaitníonn le daoine – am teaghlaigh ardchaighdeáin, eispéiris áitiúla, agus an tallann iontach agus na traidisiúin iontacha atá ann ar fud Fhine Gall a shárthaispeáint.”

Is féidir le cuairteoirí a bheith ag súil arís i rith an deiridh seachtaine le clár bríomhar de shiamsaíocht bheo, de thaispeántais bhia, de sheónna talmhaíochta, de mhargaí ceardaithe agus ceardaíochta agus de ghníomhaíochtaí atá oiriúnach do theaghlaigh.

I measc bhuaicphointí na féile beidh:

· Gort Feirmeoirí: Is é Grúpa Feirmeoirí Fhine Gall a óstálfaidh an Gort Feirmeoirí, ina mbeidh ranganna eallaigh, trialacha madraí caorach, alpacaí, muca, agus caoirigh. Bain sult as taispeántais de mhodhanna agus innealra feirmeoireachta traidisiúnta agus nua-aimseartha, mar aon le ceachtanna spraíúla damhsa, lena n-áirítear Jeighbh, Válsa, Foxtrot, Mearchéim, agus Damhsa Líne.

· NUA: Ciorcal Bia Fhine Gall: Faigh blaiseadh den bhia áitiúil is fearr trí thaispeántais bheo chócaireachta ó phríomhchócairí Fhine Gall, trí agallaimh “Buail leis an Déantóir”, trí sheastáin ceardaithe, agus trí Mhála Táirgí nua Chiorcal Bia Fhine Gall atá lán le táirgí áitiúla.

· An Puball Gairneoireachta: Is é Cumann Gairneoireachta Fhine Gall a reáchtálfaidh an Puball Gairneoireachta, áit a dtairgfear taispeántais bláthanna agus gharraíodóireachta, ceardlanna praiticiúla, agus sainchomhairle.

· Crios Spraoi Teaghlaigh: Beidh an Crios Spraoi Teaghlaigh ina áit thiomnaithe do leanaí ina mbeidh inséidtigh, ealaíona agus ceardaíocht, seónna draíochta, agus taispeántais sorcais. Áireofar leis crios ciúin do theaghlaigh a dteastóidh spás suaimhneach uathu le linn an imeachta.

· Sárthaispeántas Eachaíochta: Is iad Madraí Giorria Fhine Gall a óstálfaidh an Sárthaispeántas Eachaíochta, agus comórtais den scoth ar siúl lena linn. Áireofar leo sin Mórchomórtas Eachaíochta Náisiúnta Gain Alltech (atá á urrú ag Joe Duffy Motors), Turas Laighean Mervue, ranganna cáilithe RDS agus NIF, chomh maith le ranganna Trádála, ranganna Tiomána Príobháidí, agus ranganna Boppers agus Trotters do mharcaigh óga.

· Ceol agus Damhsa Beo: Bain taitneamh as taibhléirithe bríomhara sa Gharraí Daingean, áit a mbeidh ceol beo, bia agus deoch iontach, agus féiríní saor in aisce ar fáil i spás Shráidbhaile Fhine Gall.

Chun tacú leis an bhformáid athnuaite seo, moltar do dhaoine a bheidh ag freastal ar an imeacht seo a socruithe taistil a phleanáil roimh ré agus iompar poiblí a úsáid. Tá réamhroghanna páirceála ar fáil ag rátaí lascainithe.

Téigh chuig www.flavoursoffingal.ie chun tuilleadh mionsonraí a fháil faoi shocruithe taistil agus faoi na himeachtaí, nó lean sinn ar na meáin shóisialta chun an t-eolas is deireanaí agus fógraí tráthrialta a fháil.