Tá Ionad Pobail Bhaile an Hartaigh beagnach críochnaithe, agus na heochracha tugtha ar aghaidh go hoifigiúil do Chomhairle Contae Fhine Gall
Tá athoscailt Ionad Pobail Bhaile an Hartaigh, rud a bhfuiltear ag súil go mór leis, céim eile níos gaire anois tar éis aistriú oifigiúil na saoráide chuig Comhairle Contae Fhine Gall inniu (Dé hAoine).
Thug John Healy agus Aidan O’Connell ó Vision Contracting eochracha an ionaid ar aghaidh. Chosain na hathchóirithe móra thart ar €2 mhilliún. Tabharfaidh foireann Forbartha Pobail Chomhairle Contae Fhine Gall tacaíocht leanúnach don ionad, ag obair di i ndlúthchomhar leis an bpobal áitiúil chun a chinntiú go leanfaidh an t-ionad de bheith rathúil agus ag freagairt do riachtanais áitiúla.
Tá Ionad Pobail Bhaile an Hartaigh tar éis bunathrú ina shaoráid nua-aimseartha, inrochtana agus éifeachtúil ó thaobh fuinnimh de mar gheall ar an athchóiriú cuimsitheach. Áirítear leis na huasghráduithe athshreangú iomlán an fhoirgnimh, suiteáil leithreas inrochtana, deisiúcháin riachtanacha ar an ardán, athsholáthar doirse dóiteáin, agus uasghráduithe ar an bpáirc uile-aimsire. Leis na feabhsuithe sin, cinnteofar go mbeidh an t-ionad in ann leanúint de bheith ag freastal ar riachtanais mhéadaitheacha agus éagsúla phobal Bhaile an Hartaigh. Thug foireann ailtirí FCC turas treoraithe ar an bhfoirgneamh do na daoine a bhí i láthair ag an ócáid aistrithe seilbhe ar maidin, ar lena linn a taispeánadh gach a bhfuil le tairiscint ag an bhfoirgneamh nua.
Dúirt an Comh. Tom O’Leary, Méara Fhine Gall: "Is infheistíocht shuntasach i mBaile Átha Cliath 15 é an t-athchóiriú iontach seo, agus táimid thar a bheith bródúil as bonneagar pobail atá ar chaighdeán chomh hard sin a sholáthar do phobal Bhaile an Hartaigh. Beidh sé ina ionad a dtiocfaidh rath agus bláth air mar phointe fócasach bríomhar do chónaitheoirí agus a chabhróidh le tacú leis na grúpaí pobail agus deonacha iomadúla atá sa cheantar áitiúil.”
Tógadh an t-ionad ar dtús sna 1980idí, agus tá sé ag fónamh mar mhol ríthábhachtach don phobal áitiúil le fada an lá. Thar na blianta, cuireadh raon leathan gníomhaíochtaí ar siúl ann, lena n-áirítear cláir iarscoile, oícheanta biongó, ranganna karate, agus súgradh réamhscoile.
Dúirt Paul Carroll, Stiúrthóir Tithíochta agus Forbartha Pobail: “Ba mhaith liom buíochas a ghabháil lenár bhfoireann Forbartha Pobail as an tionscadal seo a threorú, agus lenár nAiltire Contae, lenár gcomhairleoirí agus lenár gconraitheoirí, a d’oibrigh i gcomhar le Bord an Ionaid Pobail agus leis an bpobal áitiúil, chun an tsaoráid iontach seo a chruthú don cheantar.”
Dúirt Lorraine Abbey, Cathaoirleach Ionad Pobail Bhaile an Hartaigh: "Táimid thar a bheith sásta le bunathrú an ionaid. Tá na feabhsuithe suntasach agus táimid ag súil le húsáid a bhaint as na spásanna nua iontacha seo agus le freastal ar riachtanais an phobail go ceann i bhfad.”
Rinne Comhairle Contae Fhine Gall an t-athchóiriú a chistiú den chuid is mó, agus tacaíocht cistiúcháin breise faighte ón gCiste Aitheantais Pobail, ó Chiste Infheistíochta na Lárionad Pobail, agus ó Chistiú Caipitil Spóirt na Roinne Turasóireachta, Cultúir, Ealaíon, Gaeltachta, Spóirt agus Meán. Áiríodh le foireann an tionscadail Rannóg Ailtirí Chomhairle Contae Fhine Gall, Vision Contracting, McCrae Consulting Engineers agus FLN Consulting Engineers.
Déanfar oibreacha feistithe deiridh ar an ionad sula n-athosclófar é go hiomlán don phobal.