Coinníonn tránna Fhine Gall gradaim measúil an Bhrait Ghoirm i 2025
Agus Éire ag ullmhú do shéasúr snámha an tsamhraidh, tá áthas ar Chomhairle Contae Fhine Gall a fhógairt gur bronnadh Bratacha Gorma agus Gradaim an Chósta Ghlais uirthi arís i 2025.
Agus Éire ag ullmhú do shéasúr snámha an tsamhraidh, tá áthas ar Chomhairle Contae Fhine Gall a fhógairt gur bronnadh Bratacha Gorma agus Gradaim an Chósta Ghlais uirthi arís i 2025.
Tá stádas an Bhrait Ghoirm coinnithe ag tránna Phort Mearnóg (An Trá Mhín) agus Trá Bhaile Carraige i nDomhnach Bat, rud a léiríonn a gcáilíocht uisce, a sábháilteacht agus a mbainistíocht chomhshaoil den scoth. Ina theannta sin, fuair Trá Bhaile Carraige Gradam Cósta Glas arís, a thugann aitheantas do thránna as a n-áilleacht nádúrtha, a dtimpeallacht ghlan agus a n-uisce snámha ardchaighdeáin.
Chuir Méara Fhine Gall, an Comhairleoir Brian McDonagh, fáilte roimh an nuacht, ag rá: “Mar dhuine a bhí ag snámh ar Thrá Phort Mearnóg ar feadh mo shaoil, tá áthas orm gur choinnigh muid ár mbratach arís. Is léiriú iad Gradaim an Bhrait Ghoirm agus an Chósta Ghlais ar an obair chrua atá á déanamh ag foireann na comhairle agus ag ár bpobail chun ár dtránna a choinneáil glan, sábháilte agus fáilteach do chách. Ba mhaith liom buíochas ar leith a ghabháil leis na grúpaí Bailte Slachtmhara agus Cósta Glan as an obair a dhéanann siad ar ár dtránna."
Dúirt Stiúrthóir na n-Oibríochtaí i bhFine Gall, MaryT Daly: “Ní hamháin go bhfuil na gradaim seo faoi cháilíocht an uisce ach faoi rannpháirtíocht sa phobal, oideachas comhshaoil agus inbhuanaitheacht chomh maith. Ba mhaith liom buíochas ó chroí a ghabháil leis na grúpaí pobail, na hoibrithe deonacha agus na cónaitheoirí go léir a bhfuil ról ríthábhachtach acu maidir lenár dtránna a choinneáil glan, sábháilte agus slán ó thaobh an chomhshaoil de. Molaim do gach duine taitneamh a bhaint as ár dtránna go léir go freagrach agus leanúint ar aghaidh ag tacú le hiarrachtaí chun ár gcósta nádúrtha a chosaint.”
Chun cabhrú le cáilíocht uisce den scoth a choinneáil ar fud na dtránna uile, tá Fine Gall ag impí ar úinéirí madraí glanadh suas i ndiaidh a gcuid peataí freisin. Is féidir le cás amháin de chac madraí limistéar chomh mór le cúirte leadóige a thruailliú, rud a chruthaíonn riosca tromchúiseach don tsláinte phoiblí. Chun aird a tharraingt air seo, féach ar an mbeochan faisnéiseach seo a léiríonn an fíorthionchar a bhaineann le gan an cac a ghlanadh i ndiaidh do mhadra: https://youtu.be/7bas6zvBmM4.
Chun sonraí a fháil faoi shuíomhanna feadh chósta 88km Fhine Gall, tabhair cuairt ar: https://www.fingal.ie/visitor/trips/find-beach